ಮತದಾರರ ಪಟ್ಟಿ ಪರಿಷ್ಕರಣೆ ವೇಗಗೊಳಿಸಲು ಮಾಸ್ಟರ್ ಪ್ಲಾನ್: 4.81 ಕೋಟಿ ಜನರಿಗೆ ಮನೆ-ಮನೆಗೇ ಉಚಿತ ಜಾತಿ ಪ್ರಮಾಣ ಪತ್ರ ವಿತರಣೆ
ಮತದಾರರ ಪಟ್ಟಿ ಪರಿಷ್ಕರಣೆ ವೇಗಗೊಳಿಸಲು ಮಾಸ್ಟರ್ ಪ್ಲಾನ್: 4.81 ಕೋಟಿ ಜನರಿಗೆ ಮನೆ-ಮನೆಗೇ ಉಚಿತ ಜಾತಿ ಪ್ರಮಾಣ ಪತ್ರ ವಿತರಣೆ
ಬೆಂಗಳೂರು: ಭಾರತ ಚುನಾವಣಾ ಆಯೋಗದ ನಿರ್ದೇಶನದಂತೆ ರಾಜ್ಯದಲ್ಲಿ ಹಮ್ಮಿಕೊಳ್ಳಲಾಗಿರುವ ‘ಮತದಾರರ ಪಟ್ಟಿಯ ವಿಶೇಷ ತೀವ್ರ ಪರಿಷ್ಕರಣೆ’ (SIR) ಕಾರ್ಯವನ್ನು ಸುಲಭಗೊಳಿಸಲು ರಾಜ್ಯ ಸರ್ಕಾರ ಭರ್ಜರಿ ಸಿದ್ಧತೆ ನಡೆಸಿದೆ. ಅರ್ಹತೆಯನ್ನು ಸಾಬೀತುಪಡಿಸಲು ಅಗತ್ಯವಿರುವ 11 ಪ್ರಮುಖ ದಾಖಲೆಗಳ ಪೈಕಿ ಒಂದಾದ ‘ಜಾತಿ ಪ್ರಮಾಣ ಪತ್ರ’ವನ್ನು ಉಚಿತವಾಗಿ ಸಾರ್ವಜನಿಕರ ಮನೆ-ಮನೆಗೇ ತಲುಪಿಸಲು ಕಂದಾಯ ಆಯುಕ್ತಾಲಯವು ರಾಜ್ಯದ ಎಲ್ಲಾ ಜಿಲ್ಲಾಧಿಕಾರಿಗಳಿಗೆ ಕಟ್ಟುನಿಟ್ಟಿನ ಆದೇಶ ಹೊರಡಿಸಿದೆ.
ಮೊಬೈಲ್‌ನಲ್ಲೇ ಸಿಗಲಿದೆ ಲಿಂಕ್:
ಕಂದಾಯ ಇಲಾಖೆಯ ಅಧಿಕೃತ ಡೇಟಾ ಬೇಸ್‌ನಲ್ಲಿ ಲಭ್ಯವಿರುವ ಸಾರ್ವಜನಿಕರ ಮೊಬೈಲ್ ಸಂಖ್ಯೆಗಳಿಗೆ ಜಾತಿ ಪ್ರಮಾಣ ಪತ್ರದ ‘ಡೌನ್‌ಲೋಡ್ ಲಿಂಕ್’ ಅನ್ನು SMS ಮತ್ತು ವಾಟ್ಸಾಪ್ (WhatsApp) ಮೂಲಕ ರವಾನಿಸುವ ತಾಂತ್ರಿಕ ಪ್ರಕ್ರಿಯೆಗೆ ಚಾಲನೆ ನೀಡಲಾಗಿದೆ. ಇದರೊಂದಿಗೆ ಸಾರ್ವಜನಿಕರ ಬಹುದಿನಗಳ ಬೇಡಿಕೆಯಾಗಿದ್ದ ‘ಶಾಶ್ವತ ನಿವಾಸಿ ಪ್ರಮಾಣ ಪತ್ರ’ ವಿತರಿಸುವ ನೂತನ ಸೇವೆಯನ್ನು ಸಹ ಆದ್ಯತೆಯ ಮೇರೆಗೆ ಆರಂಭಿಸಲಾಗಿದೆ.
ಪಾರದರ್ಶಕ ಮುದ್ರಣ ಮತ್ತು ವಿತರಣೆ:
ರಾಜ್ಯಾದ್ಯಂತ ಒಟ್ಟು 4.81 ಕೋಟಿ ಜಾತಿ ಪ್ರಮಾಣ ಪತ್ರಗಳ ಪಿಡಿಎಫ್ (PDF) ಫೈಲ್‌ಗಳನ್ನು ಈಗಾಗಲೇ ಸಿದ್ಧಪಡಿಸಲಾಗಿದ್ದು, ಅವುಗಳನ್ನು ಜಿಲ್ಲಾವಾರು, ತಾಲೂಕುವಾರು ಹಾಗೂ ಗ್ರಾಮವಾರು ವಿಂಗಡಿಸಲಾಗಿದೆ. ಸಾರ್ವಜನಿಕ ಸಂಗ್ರಹಣೆಗಳಲ್ಲಿ ಪಾರದರ್ಶಕತೆ ಕಾಯ್ದೆ 1999ರ ಅನ್ವಯ ಈ ಪ್ರಮಾಣ ಪತ್ರಗಳನ್ನು ತಾಲೂಕು ಮಟ್ಟದಲ್ಲೇ ಮುದ್ರಿಸಲು ಕ್ರಮ ಕೈಗೊಳ್ಳಲಾಗಿದೆ. ಈ ಪ್ರಮಾಣ ಪತ್ರದೊಂದಿಗೆ ಮುಖ್ಯಮಂತ್ರಿಯವರ ಜಾಗೃತಿ ಸಂದೇಶದ ಕಲರ್ ಪ್ರಿಂಟ್ ಹಾಗೂ ಹಿಂಭಾಗದಲ್ಲಿ ಇತರೆ ದಾಖಲೆಗಳ ಪಟ್ಟಿಯನ್ನು ಕಡ್ಡಾಯವಾಗಿ ಮುದ್ರಿಸಿ ಹಂಚಲು ಸೂಚಿಸಲಾಗಿದೆ.
ವಿಶೇಷ ಆಪ್ ಮೂಲಕ ಸ್ವೀಕೃತಿ:
ಪ್ರಮಾಣ ಪತ್ರಗಳನ್ನು ಸಾರ್ವಜನಿಕರಿಗೆ ಯಶಸ್ವಿಯಾಗಿ ತಲುಪಿಸಿದ ನಂತರ, ಅವರಿಂದ ಡಿಜಿಟಲ್ ಸ್ವೀಕೃತಿ (Acknowledgment) ಪಡೆಯಲು ಕಂದಾಯ ಇಲಾಖೆಯು ವಿಶೇಷ ಆಪ್ ಒಂದನ್ನು ಅಭಿವೃದ್ಧಿಪಡಿಸಿದೆ. ವಿತರಣಾ ಸಿಬ್ಬಂದಿಯು ಫಲಾನುಭವಿಯ ಮೊಬೈಲ್ ಸಂಖ್ಯೆ ಅಥವಾ ಆಧಾರ್ ಸಂಖ್ಯೆಯನ್ನು ಈ ಆಪ್‌ನಲ್ಲಿ ನಮೂದಿಸುವ ಮೂಲಕ ವಿತರಣೆಯ ನಿಖರ ಮಾಹಿತಿಯನ್ನು ಇಲಾಖೆಯ ಸರ್ವರ್‌ಗೆ ರವಾನಿಸಲಿದ್ದಾರೆ. ಈ ಇಡೀ ಪ್ರಕ್ರಿಯೆಯನ್ನು ತುರ್ತಾಗಿ ಕಾರ್ಯಗತಗೊಳಿಸುವಂತೆ ಕಂದಾಯ ಆಯುಕ್ತಾಲಯವು ಅಧಿಕಾರಿಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಿದೆ.
ರಾಜ್ಯ ಸಚಿವ ಸಂಪುಟದ ಆದೇಶ: ರಾಜ್ಯದ ನಾಗರಿಕರಿಗೆ ದೊಡ್ಡ ಮಟ್ಟದ ಆಡಳಿತಾತ್ಮಕ ಸುಧಾರಣೆಯೊಂದನ್ನು ತರಲು ಸಚಿವ ಸಂಪುಟ ಮಹತ್ವದ ತೀರ್ಮಾನ ಕೈಗೊಂಡಿದ್ದು, ಅದರಂತೆ ಕಂದಾಯ ಇಲಾಖೆಯು ಅಧಿಕೃತ ಆದೇಶ ಹೊರಡಿಸಿದೆ. ರಾಜ್ಯದ ಕಂದಾಯ ಇಲಾಖೆಯ ಡೇಟಾ ಬೇಸ್‌ನಲ್ಲಿರುವ ಒಟ್ಟು 4.81 ಕೋಟಿ ಜಾತಿ ಪ್ರಮಾಣ ಪತ್ರಗಳ (PDF) ಮುದ್ರಣ ಹಾಗೂ ವಿತರಣೆಯನ್ನು ಅತ್ಯಂತ ತುರ್ತಾಗಿ ಪೂರ್ಣಗೊಳಿಸುವಂತೆ ಎಲ್ಲಾ ಜಿಲ್ಲಾಧಿಕಾರಿಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಲಾಗಿದೆ.
ಸ್ಥಳೀಯ ಮಟ್ಟದಲ್ಲೇ ಮುದ್ರಣ ಕಾರ್ಯ:ಅಟಲ್ ಜೀ ಜನಸ್ನೇಹಿ ನಿರ್ದೇಶನಾಲಯದಿಂದ ಒದಗಿಸಲಾಗುವ ಈ ಡೇಟಾವನ್ನು ಜಿಲ್ಲಾ, ತಾಲೂಕು ಮತ್ತು ಗ್ರಾಮವಾರು ಪ್ರತ್ಯೇಕವಾಗಿ ವಿಂಗಡಿಸಲಾಗುತ್ತದೆ. ಪಾರದರ್ಶಕತೆಯನ್ನು ಕಾಯ್ದುಕೊಳ್ಳಲು ‘ಕರ್ನಾಟಕ ಸಾರ್ವಜನಿಕ ಸಂಗ್ರಹಣೆಗಳಲ್ಲಿ ಪಾರದರ್ಶಕತೆ ಕಾಯ್ದೆ 1999’ ರ ಅನ್ವಯವೇ ಸೂಕ್ತ ಮುದ್ರಣಾಲಯಗಳನ್ನು ಆಯ್ಕೆ ಮಾಡಿ, ತಾಲೂಕು ಅಥವಾ ಹೋಬಳಿ ಮಟ್ಟದಲ್ಲೇ ಮುದ್ರಣ ಕಾರ್ಯವನ್ನು ಕೈಗೊಳ್ಳಲು ಆದೇಶಿಸಲಾಗಿದೆ.
ವಿಶೇಷ ಆಕರ್ಷಣೆ ಮತ್ತು ವೆಚ್ಚದ ಮಿತಿ:ಈ ಪ್ರಮಾಣ ಪತ್ರಗಳ ಮುಂಭಾಗದಲ್ಲಿ ಮಾನ್ಯ ಮುಖ್ಯಮಂತ್ರಿಯವರ ಜಾಗೃತಿ ಸಂದೇಶವನ್ನು ಆಕರ್ಷಕ ಬಣ್ಣದ ಮುದ್ರಣದಲ್ಲಿ (Colour Print) ಹಾಗೂ ಹಿಂಭಾಗದಲ್ಲಿ ಅಗತ್ಯ ದಾಖಲಾತಿಗಳ ಪಟ್ಟಿಯನ್ನು ಕಪ್ಪು-ಬಿಳುಪು (Black and White) ಮಾದರಿಯಲ್ಲಿ ಮುದ್ರಿಸಲಾಗುತ್ತದೆ. ಈ ಮೂರು ಪ್ರತಿಗಳ ಮುದ್ರಣ ವೆಚ್ಚವು ಸಾರ್ವಜನಿಕ ಹಣ ಪೋಲಾಗದಂತೆ ತಡೆಯಲು ಗರಿಷ್ಠ 2.25 ರೂಪಾಯಿಗಳನ್ನು ಮೀರಬಾರದು ಎಂದು ದರ ನಿಗದಿಪಡಿಸಲಾಗಿದೆ.
ಡಿಜಿಟಲ್ ಆ್ಯಪ್ ಮೂಲಕ ನಿಗಾ:ಪ್ರಮಾಣ ಪತ್ರಗಳು ಅರ್ಹ ಸಾರ್ವಜನಿಕರಿಗೆ ತಲುಪಿರುವುದನ್ನು ಖಚಿತಪಡಿಸಿಕೊಳ್ಳಲು ವಿಶೇಷ ಆ್ಯಪ್ (App) ಒಂದನ್ನು ಅಭಿವೃದ್ಧಿಪಡಿಸಲಾಗಿದೆ. ಪ್ರಮಾಣ ಪತ್ರ ವಿತರಿಸಿದ ತಕ್ಷಣ, ವಿತರಕರು ಫಲಾನುಭವಿಯ ಮೊಬೈಲ್ ಸಂಖ್ಯೆ ಅಥವಾ ಆಧಾರ್ ಸಂಖ್ಯೆಯನ್ನು ಆ್ಯಪ್‌ನಲ್ಲಿ ನಮೂದಿಸಿ ಸ್ವೀಕೃತಿಯನ್ನು ಡಿಜಿಟಲ್ ರೂಪದಲ್ಲಿ ಕಡ್ಡಾಯವಾಗಿ ಅಪ್‌ಡೇಟ್ ಮಾಡಬೇಕಿದೆ.ಕಂದಾಯ ಆಯುಕ್ತಾಲಯದ ಆಯುಕ್ತರಾದ ಮೀನಾ ನಾಗರಾಜ್ ಸಿ.ಎನ್. ಅವರು ಈ ಎಲ್ಲಾ ಪ್ರಕ್ರಿಯೆಗಳನ್ನು ಕಾಲಮಿತಿಯೊಳಗೆ ಅತ್ಯಂತ ತುರ್ತಾಗಿ ಕಾರ್ಯಗತಗೊಳಿಸುವಂತೆ ಕಟ್ಟುನಿಟ್ಟಿನ ಆದೇಶ ಜಾರಿಗೊಳಿಸಿದ್ದಾರೆ.
ಸುದ್ದಿ ಮತ್ತು ಜಾಹೀರಾತು ನೀಡಲು-7204641701
ಮೀನಿನಹೆಜ್ಜೆ ನ್ಯೂಸ್, ಸಾಗರ
Comments
Post a Comment