ಸುಭಾಷ್ ಕೌಟಳಿಗೆ 'ಸೈನಿಕ ಸಾಗರ' ಪ್ರಶಸ್ತಿ ಪ್ರದಾನ

ಸುಭಾಷ್ ಕೌತಳಿಗೆ 'ಸೈನಿಕ ಸಾಗರ' ಪ್ರಶಸ್ತಿ ಪ್ರದಾನ

ಸಾಗರ: ತಾಲ್ಲೂಕಿನ ಕೌಟಳ್ಳಿಯವರಾದ ಹಾಗೂ ಸಮಾಜಮುಖಿ ಚಿಂತನೆಯುಳ್ಳ ಶ್ರೀ ಸುಭಾಷ್ ಕೌಟಳಿ ಅವರಿಗೆ ಅವರ ವಿಶಿಷ್ಟ ಸಾಮಾಜಿಕ ಸೇವೆ ಮತ್ತು ಪರಿಸರ ಕಾಳಜಿಯನ್ನು ಗುರುತಿಸಿ 'ಸೈನಿಕ ಸಾಗರ' ಪ್ರಶಸ್ತಿಯನ್ನು ನೀಡಿ ಗೌರವಿಸಲಾಗಿದೆ. ಮಾಜಿ ಯೋಧರ ಕಲ್ಯಾಣ ಟ್ರಸ್ಟ್ (ರಿ.) ಮತ್ತು ಅಖಿಲ ಕರ್ನಾಟಕ ಮಾಜಿ ಸೈನಿಕರ ಸಂಘದ ಸಾಗರ ಪ್ರಾಂತ್ಯದ ವತಿಯಿಂದ ಈ ಸನ್ಮಾನವನ್ನು ನೆರವೇರಿಸಲಾಯಿತು.

ಬಾಲ್ಯದಿಂದಲೂ ವಿವಿಧ ಹೋರಾಟಗಳು ಮತ್ತು ಸಾರ್ವಜನಿಕ ಕಾರ್ಯಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿರುವ ಸುಭಾಷ್ ಕೌತಳಿ ಅವರು, ತಮ್ಮ ಕಷ್ಟದ ದಿನಗಳಲ್ಲೂ ಸಮಾಜ ಸೇವೆಗೆ ಒತ್ತು ನೀಡಿದ್ದಾರೆ. ಮಡೇನೂರು ಡ್ಯಾಮ್ ಸಂತ್ರಸ್ತರಿಗೆ ನೆರವು ನೀಡುವುದರ ಜೊತೆಗೆ, ನೇತಾಜಿ ಸುಭಾಷ್ ಚಂದ್ರ ಬೋಸ್ ಯುವ ಸೇನೆ ಕಟ್ಟಿ ಸೈನಿಕರ ಹಕ್ಕುಗಳಿಗಾಗಿ ಶ್ರಮಿಸಿದ್ದಾರೆ. ಅಲ್ಲದೆ, ಸಾಗರದಲ್ಲಿ ಮಾಜಿ ಯೋಧರ ಕಲ್ಯಾಣ ಟ್ರಸ್ಟ್ ಸ್ಥಾಪನೆಗೆ ಇವರ ಪ್ರಮುಖ ಕೊಡುಗೆಯಿದೆ.

ಕೇವಲ ಸಾಮಾಜಿಕ ಚಟುವಟಿಕೆಗಳಷ್ಟೇ ಅಲ್ಲದೆ, ಪರಿಸರ ಸಂರಕ್ಷಣೆಯಲ್ಲೂ ಇವರು ಮಾದರಿಯಾಗಿದ್ದಾರೆ. ಸಾಗರದ ಸುತ್ತಮುತ್ತಲಿನ  ವಾರ್ಡ್‌ಗಳಲ್ಲಿ ಮತ್ತು ಖಾಲಿ ಮೈದಾನಗಳಲ್ಲಿ ಸೈನಿಕರ ಹೆಸರಿನಲ್ಲಿ ಗಿಡಗಳನ್ನು ನೆಟ್ಟು ಬೆಳೆಸುತ್ತಿದ್ದು, ಇದುವರೆಗೂ ಸುಮಾರು ಮೂರು ಸಾವಿರಕ್ಕೂ ಅಧಿಕ ಗಿಡಗಳನ್ನು ಬೆಳೆಸಿ ಅಪ್ಪಟ ಪರಿಸರ ಪ್ರೇಮ ಮೆರೆದಿದ್ದಾರೆ. ಇವರ ಈ ಅಪೂರ್ವ ಕೊಡುಗೆಯು ಮುಂದಿನ ಪೀಳಿಗೆಗೆ ಮಾದರಿಯಾಗಿದೆ.

ಸುಭಾಷ್ ಕೌತಳಿ ಅವರ ಸ್ಫೂರ್ತಿದಾಯಕ ಜೀವನ, ಸೈನಿಕರ ಮೇಲಿನ ಅಭಿಮಾನ ಹಾಗೂ ಸಮಾಜೋ-ಪರಿಸರ ಕಾಳಜಿಯನ್ನು ಮೆಚ್ಚಿ ಮಾಜಿ ಯೋಧರ ಕಲ್ಯಾಣ ಟ್ರಸ್ಟ್ ವತಿಯಿಂದ ಈ ಗೌರವವನ್ನು ಅರ್ಪಿಸಲಾಗಿದೆ. ಈ ಕಾರ್ಯಕ್ರಮವು ಸ್ಥಳೀಯವಾಗಿ ಅನೇಕರಿಗೆ ಸ್ಫೂರ್ತಿ ನೀಡಿದ್ದು, ಸಾರ್ವಜನಿಕರಿಂದ ಪ್ರಶಂಸೆ ವ್ಯಕ್ತವಾಗಿದೆ.

ಸುದ್ದಿ ಮತ್ತು ಜಾಹೀರಾತು ನೀಡಲು-7204641701

ಮೀನಿನಹೆಜ್ಜೆ ನ್ಯೂಸ್, ಸಾಗರ