ಕ್ಯಾಸನೂರು ಅಡಿಕೆ ತಳಿ ಕಾರ್ಯಾಗಾರ: ಸಂಶೋಧನಾ ಕೇಂದ್ರ ಸ್ಥಾಪನೆಗೆ ಒತ್ತಾಯ
ಕ್ಯಾಸನೂರು ಅಡಿಕೆ ತಳಿ ಕಾರ್ಯಾಗಾರ: ಸಂಶೋಧನಾ ಕೇಂದ್ರ ಸ್ಥಾಪನೆಗೆ ಒತ್ತಾಯ
ಚಿಕ್ಕಮಗಳೂರು: ಇತ್ತೀಚಿನ ದಿನಗಳಲ್ಲಿ ರಾಜ್ಯಾದ್ಯಂತ ರೈತರ ವಲಯದಲ್ಲಿ ಭಾರಿ ಪ್ರಸಿದ್ಧಿ ಹಾಗೂ ಆಕರ್ಷಣೆ ಪಡೆಯುತ್ತಿರುವ 'ಕ್ಯಾಸನೂರು ಅಡಿಕೆ ತಳಿ'ಯ ಕುರಿತು ಸಂಪೂರ್ಣ ಮಾಹಿತಿ ನೀಡುವ ವಿಶೇಷ ಕಾರ್ಯಾಗಾರವೊಂದು ಆಗಸ್ಟ್ 22 ರಂದು ಇಲ್ಲಿನ ಪ್ರಸಿದ್ಧ ಕಾಫಿ ಗ್ರೋವ್ ರೆಸಾರ್ಟ್‌ನಲ್ಲಿ ಅತ್ಯಂತ ಯಶಸ್ವಿಯಾಗಿ ಜರುಗಿತು. 'ಹಸಿರು ಆರ್ಗಾನಿಕ್ಸ್' ಹಾಗೂ 'ಹಸಿರು ಟೂರಿಸಂ' ಸಂಸ್ಥೆಗಳ ಆಶ್ರಯದಲ್ಲಿ ಈ ಉಪಯುಕ್ತ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು.
*ರೋಗ ನಿರೋಧಕ ಮತ್ತು ಸರ್ವಋತು ತಳಿ: ವಿಕಾಸ್ ಕ್ಯಾಸನೂರು*
ಕಾರ್ಯಾಗಾರದಲ್ಲಿ ಪಾಲ್ಗೊಂಡಿದ್ದ ಕ್ಯಾಸನೂರು ಅಡಿಕೆ ನರ್ಸರಿಯ ಮಾಲೀಕ ವಿಕಾಸ್ ಕ್ಯಾಸನೂರು ಕಾರ್ಯಕ್ರಮದಲ್ಲಿ ಕ್ಯಾಸನೂರು ತಳಿಯ ಅಡಿಕೆ ಸಸಿಗಳು, ಕೆಂಪು ಅಡಿಕೆ, ಚಾಲಿ ಅಡಿಕೆ ಹಾಗೂ ಬಂಪರ್ ಇಳುವರಿ ನೀಡುವ ಅಡಿಕೆ ಗೊನೆಗಳ ಲೈವ್ ಪ್ರದರ್ಶನವನ್ನು ನೀಡಿ ರೈತರಿಗೆ ಸಮಗ್ರ ಮಾಹಿತಿ ಒದಗಿಸಿದರು.
ಬಳಿಕ ಮಾತನಾಡಿದ ಅವರು, "ಕ್ಯಾಸನೂರು ಅಡಿಕೆ ತಳಿಯು ನಮ್ಮ ಹೆಮ್ಮೆಯ ನಾಟಿ ತಳಿಯಾಗಿದೆ. ಇದು ಪ್ರಕೃತಿ ಸಹಜವಾಗಿಯೇ ರೋಗನಿರೋಧಕ ಶಕ್ತಿ ಹೊಂದಿದ್ದು, ಇತ್ತೀಚಿನ ಮಾರಕ ರೋಗಗಳಿಗೆ ತುತ್ತಾಗುವ ಸಾಧ್ಯತೆ ತೀರಾ ಕಡಿಮೆ ಇದೆ. ರಾಜ್ಯದ ಎಲ್ಲಾ ರೀತಿಯ ಹವಾಮಾನ ಮತ್ತು ವಾತಾವರಣಕ್ಕೂ ಅತ್ಯುತ್ತಮವಾಗಿ ಹೊಂದಿಕೊಳ್ಳುವ ವಿಶಿಷ್ಟ ಗುಣ ಈ ತಳಿಗಿದೆ. ಇಂತಹ ಕೃಷಿ ಪೂರಕ ಕಾರ್ಯಾಗಾರವನ್ನು ಆಯೋಜಿಸಿ ರೈತರಲ್ಲಿ ಜಾಗೃತಿ ಮೂಡಿಸುತ್ತಿರುವ ಹಸಿರು ಆರ್ಗಾನಿಕ್ಸ್ ಸಂಸ್ಥೆಯ ಕಾರ್ಯ ತುಂಬಾ ಸಂತಸ ತಂದಿದೆ " ಎಂದು ಸಂತಸ ವ್ಯಕ್ತಪಡಿಸಿದರು.
*ಸಂಶೋಧನಾ ಕೇಂದ್ರ ಸ್ಥಾಪನೆಗೆ ಕೃಷಿ ವಿವಿಗೆ ಆಗ್ರಹ*
ಪ್ರಸ್ತುತ ದಿನಗಳಲ್ಲಿ ಈ ತಳಿಗೆ ಹೆಚ್ಚುತ್ತಿರುವ ಬೇಡಿಕೆ ಮತ್ತು ಇದರ ಕೃಷಿ ಪ್ರಾಮುಖ್ಯತೆಯನ್ನು ಮನಗಂಡು, ಈ ವಿಶಿಷ್ಟ ತಳಿಯನ್ನು ಮತ್ತಷ್ಟು ವೈಜ್ಞಾನಿಕವಾಗಿ ಅಭಿವೃದ್ಧಿಪಡಿಸುವ ನಿಟ್ಟಿನಲ್ಲಿ ಕೃಷಿ ವಿಶ್ವವಿದ್ಯಾಲಯವು ತಕ್ಷಣವೇ ಕ್ಯಾಸನೂರು ಅಡಿಕೆ ತಳಿ ಸಂಶೋಧನಾ ಕೇಂದ್ರ' ವನ್ನು ಸ್ಥಾಪಿಸಬೇಕು ಎಂದು ಕಾರ್ಯಾಗಾರದಲ್ಲಿ ಒತ್ತಾಯಿಸಲಾಯಿತು.
ಈ ಮಹತ್ವದ ಕೃಷಿ ಚಿಂತನಾ ಕಾರ್ಯಕ್ರಮದಲ್ಲಿ ಹಸಿರು ಆರ್ಗಾನಿಕ್ಸ್ ಸಂಸ್ಥೆಯ ಪ್ರಮುಖರಾದ ಅರವಿಂದ್ ಭೂತನಕಾಡು, ಕೃಷಿ ವಲಯದಲ್ಲಿ 'ಕಾಳುಮೆಣಸಿನ ಬ್ರಹ್ಮ' ಎಂದೇ ಖ್ಯಾತರಾಗಿರುವ ವೇಣುಗೋಪಾಲ್, ಜೋಸೆಫ್ ಚಾಕೋ, ಜೆ ಎಲ್ ರಮೇಶ್ ಭಟ್, ಕಾರ್ತಿಕ್ ಪಟ್ಟದ್ ಸೇರಿದಂತೆ ಕೃಷಿ ಕ್ಷೇತ್ರದ ಹಲವು ಪ್ರಮುಖ ಸಂಪನ್ಮೂಲ ವ್ಯಕ್ತಿಗಳು ಹಾಗೂ ಪ್ರಗತಿಪರ ರೈತರು ಉಪಸ್ಥಿತರಿದ್ದರು.
ಸುದ್ದಿ ಮತ್ತು ಜಾಹೀರಾತು ನೀಡಲು-7204641701
ಮೀನಿನಹೆಜ್ಜೆ ನ್ಯೂಸ್, ಸಾಗರ
Comments
Post a Comment